ఒక వితంతువు ప్రేమలో పడటం తన తప్పా !!
బాల్యంలోనే వైధవ్యాన్ని పొందిన మాధవి, తను కోల్పోయిన వాటి గురించి చింత లేకుండా పుట్టింట ఉంటూ అందరి బాగోగులు చూసుకుంటూ అందరికీ ప్రేమ పంచుతూ అందరిచేత 'బడదీదీ' అనిపించుకునే చక్కటి పాత్ర.
సవతి తల్లి పెంపకంలో అతి గారాబంతో స్వశక్తితో నిర్ణయాలు తీసుకోవడమే మర్చిపోయి దేని గురించి పట్టింపు లేకుండా సాగిపోయే పాత్ర సురేంద్రనాథ్. అట్టి స్వేచ్ఛా రాహిత్య జీవితం నుంచి తప్పించుకు పారిపోయి కలకత్తాలో మాధవి ఇంట్లోకి ఆమె చెల్లికి చదువు చెప్పే మాస్టారుగా చేరుతాడు.
మాధవి మనసులో ప్రేమ సమాజ కట్టుబాట్లకు లోబడి తన లోపలే ఉండిపోయింది. అది ఎన్నడూ సురేంద్రనాథ్ వరకు చేరుకోలేదు.
అటు సురేంద్రనాథ్ తనకే తెలియకుండా మాధవి పై పెంచుకున్న పిచ్చి ప్రేమ చివరికి ఆమె ఒడిలో ప్రాణాలు వదిలిన క్షణం వరకు అర్థం కాలేదు.
శరత్ గారి సాహిత్య పటిమ ఈ పాత్రల చిత్రంలోనే స్పష్టంగా కనిపిస్తుంది. వారి మనసులో భావోద్వేగాలను అతి మధురంగా సరళంగా చిత్రీకరించారు.
ఎంతో సుందర అనువాదంతో పాఠకుల మనసును హత్తుకునేలా చేసే ఈ నవల కేవలం 80 పుటల కృతి. సరదాగా గంటలో చదవడం పూర్తవుతుంది. హృదయాన్ని సాంత్వన పరుస్తూనే ఆలోచింపజేసే చక్కటి కథ.